Skip to main content

follow us

Pituah Mande, Du'a jo Nasehat Pusako Minangkabau

Blog Minangkabau - Urang Minang terkenal jo pituahnyo. Urang Minang terkenal jo Kato-kato nasehatnyo nan mambuek hati lintuah. Pituah Urang Minang banyak bacarito tantang sakikk hiduik jo caro mang adok i nyo.

Pituah biasonyo di sampaikan dari nan tuo ka nan labiah mudo. Misal dari Mamak ka Panakan, Dari Ayah ka Anak, Dari Mandeh ka Anak. Dan untuak nan kali ko. Blog Minangkabau manjubo mambagikan informasi tantang pituah dari Mandeh ka Anak nyo. Dalam kasus pituah ko, Si anak ka pai marantau. Sabalun marantau di agiahlah pituah dek mandeh anak tu. Kurang labiah bunyi pituahnyo mode nan Blog Minangkabau tulihan di bawah ko.

Tagaklah anak di nan data, 
Tagak diadat jo aturan, 
Badirilah anak di nan bana, 
Jan bauru-uru marusak badan.

Kalau sipadan diasak urang, 
Nan bananyo tuka tagak, 
Tunjuakkan awak sabagai rang minang, 
Usahlah takuik darah taserak.

Darah ayah turun ka anak, 
Warih dijawek dek kamanakan, 
Usah mundur walau satapak, 
Hadok i malah sacaro jantan.

Kok pai anak ka betawi, 
Mancari pitih di rantau urang 
Usah sampai tajarek kaki, 
Sahinggo lupo jo ranah minang.

Laguah lagah bunyi padati, 
Padati anak urang kamang, 
Mambao patai sarato lado, 
Bialah sapiriang dapek pagi, 
Walaupun sasuok dapek patang, 
Ijan lah sampai baputuih aso.

Ijuak kok nyato jadi tali, 
Anau di rimbo kanalah juo, 
Isuak kok lai ado rasaki, 
Usah lupo sanak sudaro.

Bialah luluah padi di balam, 
Namun dadak baniahkan juo, 
Bialah rusuah hati di dalam, 
Namun galak manihkan juo.

Bakabuik gunuang talamau, 
Hilang ditimpo paneh pagi, 
Usah hanyuik buyuang di rantau, 
Jalang juo sanak famili.

Jikok ka ladang buyuang bisuak, 
Padi nan indak ado lai, 
Namun banto siangi juo, 
Jikok pulang buyuang bisuak, 
Kami nan indak ado lai, 
Namun pusaro jalangi juo.

Babuek baiak pado pado, 
Babuek buruak sakali jangan, 
Jan sampai diri taniayo, 
Sayang ka urang jajok di badan.

Yo lamak sabana lamak, 
Nasi urang sawah ujuang, 
Kok takana nakan jo mamak, 
Jan lupo pulang ka kampuang.

Jikok ado salah pamuda talang, 
Mohon maaf kami mintak i, 
Jikok ado umua panjang, 
Bisuak kito batamu lai.

Pailah marantau oi nak kanduang, 
Cubolah cubo sakali surang, 
Ayia janiah dek mangalia kancang, 
Jikok mangandok panyakik basarang. 
Itulah pasan mandeh nan ka dijalanan. 
Jan sampai manyasa buyuang kamudian.

Pituah Mandeh di ateh hanyo satitiak dari ribuan macam pituah mandeh nan ado di Minangkabau. Di Blog Minangkabau ko dicubo baliak mambukak buku jo di kaji baliak budayo awak ko. Jang sampai hilang dimakan zaman. Tamasuak baso Minang nan manjadi ciri kas di Blog Kaciak ko. Silahkan dunsanak babagi info ko jo nan lain. Ma tau ado nan butuah dan sadang mancari-cari kaji lamo. Tarimo kasih alah baranjua di Blog ko Sanak. Assalamualaikum...

You Might Also Like:

Comment Policy: Silahkan tuliskan komentar Anda yang sesuai dengan topik postingan halaman ini. Komentar yang berisi tautan tidak akan ditampilkan sebelum disetujui.
Buka Komentar